Бу сыл ыам ыйын 11 к. саҕалаан улууспутугар баһаартан сэрэхтээх буолуу сезона саҕаламмыта. Онтон ыла номнуо 2 нэдиэлэ ааста, балаһыанньа уустук. Кураан буолан, итиэннэ сүрүнэ - дьон дьалаҕайыттан ойуур уота турара тохтообот.
Ньурбатааҕы лесничество лесничэйин солбуйааччыта Леонид Хохсоторов иһитиннэрэринэн, былырыын ыам ыйыгар 5 ойуур баһаара турбут буоллаҕына, быйыл ыам ыйын 13 күнүттэн саҕалаан номнуо 17 ойуур баһаара буолбута регистрацияланна. Итинтэн 12 баһаар умуруоруллубута, Ньурбачаан нэһилиэгиттэн 11,5 км Көйтөн диэн сиргэ ыам ыйын 22 к. регистрацияламмыт ойуур уота төгүрүтүллэн турар. Итиннэ ДПС-тар (десантниктар) үлэлии сылдьаллар.
Билигин 4 ойуур баһаара умайар. Саамай сэрэхтээхтэрэ Маартан 5 км Үрэн диэн сиргэ турбут ойуур уота дэриэбинэҕэ чугаһаан үрэх уҥуор тиийэн кэллэ. Түмүк нэһилиэгин баһылыга Иннокентий Саморцев 30-ча буолан тыраахтырдаах баһаарга баран иһэллэрин эттэ.
Улуус баһылыгын 1-кы солбуйааччыта Артур Яковлев бүгүн Маарга тиийэ сырытта. "16 ч. саҕана ойуур баһаара Маарга кутталы үөскэтэ сырытта, - диир Артур Янович. - Аллараа күөлтэн тохтоото. Баһаар умуруоруутугэр дэриэбинэ биир өттүгэр 30 Маар олохтооҕо үлэлии сылдьаллар. Түүн Маартан эбии 20 киһи тахсыаҕа, Хаҥаластан уонна Дьаархантан 8 киһилээх көҥүл өттүнэн тэриллибит баһаарынай хамаандалар, "Якутлесресурс" ГАУ 18 үлэһитэ, ол иһигэр Үөһээ Бүлүүттэн 5 киһи кэлиэхтэрэ. Дэриэбинэ биир өттүгэр "Якутлесресурс" ГАУ филиалын үлэһиттэрэ үлэлии сылдьаллар. Сарсын "Якутлесресурс" ГАУ Сунтаардааҕы филиалыттан 6 киһи, итиэннэ Таркаайы, Акана нэһилиэктэриттэн көмөҕө кэлиэхтэрэ. Итиэннэ техникум, "Якутлесресурс" ГАУ тыраахтырдара үлэлиэхтэрэ. Маарга "баһаары утары ураты эрэсиими" биллэрэргэ быһаарылынна. Бу маннык кэккэлэһэ сытар нэһилиэктэр бэйэ-бэйэлэригэр көмөлөһүүлэрэ үчүгэй түмүгү аҕалыа диэн эрэнэбит. Билигин Маарга куттал суоһаабат".
Итини таһынан Ньурбатааҕы лесничество сибиэдинньэтинэн Ньурбачаантан 11,5 км - Тоҥус Маарыгар 5 гаа, Ньурбачаантан 8 км Ньылаҕа 37 гаа иэннээх баһаар баар. Бүгүн Күндээдэттэн 4 км кэриҥэ тэйиччи Арыылаах Маарга баһаар турбута регистрацияланна, иэнэ - 4 гаа.
"Бүгүн ойуур баһаардарын утары олохтоох дьонтон мобилизацияламмыт 51 киһи, 64 ДПС үлэһитэ, ол иһигэр Сунтаартан, Үөһээ Бүлүүттэн, Горнайтан, итиэннэ Ньурбаттан парашютнай-баһаарынай хамаанда 5 үлэһитэ уонна бэйэбит баһаарынай-химическай ыстаансыйатын үлэһиттэрэ үлэлии сылдьаллар, - диир Леонид Хохсоторов. - 5 тыраахтыр, 2 бульдозер, 15 мотопомпа туһаныллар. Балаһыанньа түргэнник уларыйа турар, ол иһигэр уоту утары охсуһар дьон ахсаана эмиэ эбиллэр.
Ойуур баһаардара барыта дьон уоту сэрэҕэ суох туттуутуттан, дьалаҕай быһыыттан таҕыстылар. Биһиги элбэх эриэйдэ тэрээһиннэрин ыыттыбыт, билигин да ыыта турабыт. Тыаҕа сынньана, шашлыктыы сылдар дьону көрсөн уоттан сэрэхтээх буолалларыгар анаммыт матырыйааллары түҥэтэбит, бэсиэдэ ыытабыт. Регистрацияламмыт баһаарга биһиги туһааннаах аактаны толоробут, ойуур фондатыгар төһө хоромньу тахсыбытын ааҕабыт. Халлааммыт да кэнники итийэн, итиэннэ сир-дойду курааннаан уокка отой сэрэхтээх буолла.
Геннадий Антонов, 24.05.2021 г.