Үөрүүлээх тэрээһиҥҥэ улуус баһылыга Алексей Иннокентьев, Ньурба к. баһылыгын солбуйааччыта Павел Необутов, улуус бочуоттаах бэтэрээнэ, Ньурба к. бочуоттаах олохтооҕо Анна Шадрина, улуус тэрилтэлэрин идэлээх сойуустарын Сүрүннүүр сэбиэтин бэрэссэдээтэлэ Меркурий Таюрскай истиҥник-иһирэхтик эҕэрдэлээтилэр. Саҥа аллея аһыллыыта Ньурба үлэһит дьонун үйэтитиигэ, төрөөбүт кыраай историятын үөрэтиигэ улахан суолтатын бэлиэтээтилэр.
Бырайыак ааптара Аман Васильев: «Бу бырайыагы бастаан 4-с кылааска үерэнэ сылдьан саҕалаабытым. Кылааһым салайааччыта Раиса Семеновна, историяҕа учууталым Маргарита Васильевна көмөлөспүттэрэ уонна икки эбээлэрим Аана уонна Лилия элбэх сүбэни биэрбиттэрэ. Бастаан бу аллеяны ыраах Убайааҥҥа Птицефабрика кэннигэр оҥороору сылдьыбыппыт, онтон Ньурба к. баһылыгар Геннадий Васильевичка билиһиннэрбиппитигэр маннык дириҥ ис хоһоонноох аллея куорат киинигэр баар буолуохтаах, элбэх киһи көрүөхтээх диэн бу Эбэ үрдүгэр оҥорор буолбуппут. Бүгүн мин наһаа үөрдүм уонна долгуйдум, элбэх да элбэх киһи кэлбититтэн астынным. Барыларыгар махтанабын уонна бырааһынньыгынан эҕэрдэлиибин!”
Салгыы Ньурба к. баһылыгын Махтал суруга урбаанньыт Евгений Захаровка уонна Аман Васильевка туттарылынна. Салгыы бырайыагы олоххо киллэрэргэ күүс-көмө буолбут, ахтыы биэрбит куорат олохтоохторугар санааларын этэллэригэр анаан, «аһаҕас микрофон» тэрилиннэ.
Мустубут дьон аллеяны астына-сэҥээрэ кэрийэн көрдүлэр. 20 постамеҥҥа норуот хаһаайыстыбатын араас салааларыгар үтүө суобастаах үлэлэринэн Ньурба социальнай-экэнэмиичэскэй сайдытыгар дьоһун кыллааттарын киллэрбит дьон испииһэктэрэ бэриллибит, анныгар баар куйаар куоду төлөпүөнүнэн туһаайдахха информацията арыллан кэлэр.
Лена Петрова, Геннадий Антонов.