Бу ый 25-26 күннэригэр буолар Дьааҥы улууhун Ыhыаҕар көхтөөхтүк бэлэмнэнии барар

172
1 минута
Бу ый 25-26 күннэригэр буолар Дьааҥы улууhун Ыhыаҕар көхтөөхтүк бэлэмнэнии барар
Улуус баhылыга Гаврил Чириков Боронукка баран нэhилиэк тэрилтэлэрин үлэhиттэрин  кытта көрсөн окко тахсыы, ынах төрөөhүнүн тула кэпсэттэ. Баhылык Боронугу окко аан бастакынан киирэр дьонноох, быйаҥнаах ходуhарардаах, үтүө-мааны сирдээх-уоттаах, хоhуун үлэhит дьонноох нэhилиэк буоларын бэлиэтээн туран, боронуктар Саха АССР төрүттэммитэ 100 сылыгар аналлаах, Дьааҥы куоратын Хоптолоох түhүлгэтигэр бу ый 25-26 күннэригэр ыытыллыахтаах Дьааҥы улууhун Ыhыаҕар көхтөөхтүк бэлэмнэнэ сылдьалларын эттэ.

Манна даҕатан эттэххэ, Василий Васильевич Ноговицын салайааччылаах 1996 сылтан үлэлиир «Тойон сүбэ» Аҕалар уопсастыбаннай түмсүүлэрэ «2000 сылга 2000 үтүө дьыала» диэн хамсааhынынан саха балаҕанын уонна оскуолаҕа тутуулары ыыппыттара.

Хоптолооххо 2016 сыллаахха ыытыллыбыт Ытык Олоҥхо Ыhыаҕын саҕаттан Дьааҥы куоратын кытта ыаллыы сытар, Дьааҥы өрүс үрдүгэр турар Бабушкинскай нэhилиэк (Боронук) сүрүн кыттааччы буолар. Кинилэр тутааччы, кыттааччы быhыытынан Ыhыах түhүлгэтин тупсарыыга бүгүн эмиэ сүрүн үлэни толорон үлэлии-хамныы сылдьаллар.

Бу күннэргэ куорат тэрилтэлэрэ уонна обургу оҕолор ыhыах түhүлгэтин ыраастыыр субуотунньукка тахсыахтара, диэн Верхоянскай куорат баhылыга Михаил Михайлович Садовников иhитиннэрдэ.

Хоптолоох сирэ харабылланар буолан алдьаныы-кээhэнии суох. Аҕыйах хонугунан уот тардыллан, түhүлгэни киэргэтии саҕаланыа. Тэрилтэлэр түөлбэлэнэр сирдэрин бэлиэтэнэн, ураhалар аналлара быhаарылланнар, аны оҥостон тиийии күүтүллэр.

«Вести Верхоянья» хаhыат