Кырачаан киһи тохсунньу 5 күнүгэр К.А. Серебрякова аатынан улуустааҕы киин балыыһаҕа маҥан халааттаах аанньаллар көмөлөрүнэн орто дойдуга үктэннэ. Ийэтэ Евдокия Максимовна Дьокуускай куоракка тохсунньу 6 күнүгэр барыахтааҕын, биир күн урутаан оҕолонон, төрөөбүт сириттэн-уотуттан ырааппакка алтыс төгүлүн ийэ буолуу дьолун биллэ.
Саҥардыы төрөөбүт кырачааны күн күбэй ийэтинээн Евдокия Никитинаны кытта дьиэлэригэр атаарар үөрүүлээх түгэҥҥэ кинилэр дьиэ кэргэттэрин эҕэрдэлии улуус дьаһалтатыттан баһылыгын солбуйааччыта Раиса Старостина, итиэннэ улуус дьаһалтатын иһинэн социальнай боппуруостарга салайааччы Антонина Юмшанова эҕэрдэлээн тураннар, кыра киһиэхэ саамай наадалаах тэрили – кэлээскэни, ону таһынан Саха АССР тэриллибитэ 100 сылыгар аналлаах «Үйэ оҕото” диэн 100 тыһ. солк. сууммалаах сертификаты ытыс тыаһын доҕуһуолунан үөрэн-көтөн туран туттардылар. Түгэһиир нэһилиэгин баһылыгын солбуйааччыта Дмитрий Сыроватский элбэх оҕолоох дьиэ кэргэн Евдокия Максимовна уонна Валерий Павлович Никитиннарга бүгүҥҥү үөрүүлээх, уол оҕоломмут дьоллоох түгэннэринэн «Түгэһиир нэһилиэгэ” муниципальнай тэриллии аатыттан эҕэрдэлээтэ уонна кырачаан киһи доруобай, чэгиэн, үтүө киһи буола улааттын диэн баҕа санаатын анаан туран сэмэй бэлэҕи туттарда.