Үөһээ Бүлүү, Сунтаар, Амма, Хаҥалас, Уус-Алдан, Ньурба, Бүлүү, Горнай, Мэҥэ-Хаҥалас, Өймөкөөн улуустарыттан уонна Дьокуускай куораттан 41 оҕо үс бөлөҕүнэн арахсан күөн күрэстэстилэр: 6-9 саастаахтар, 10-13 саастаахтар уонна 14-17 саастаахтар. «Маннык өрөспүүбүлүкэтээҕи күрэҕи бастакытын ыытабыт. Оһуохайдьыттар 7 мүнүүтэ иһигэр тылларын баайын, оһуохайы хайдах табан үҥкүүлүүллэрин, туох баар үөрэппит дьоҕурдарын сыаналыахпыт», — диэн Арыйаана Романова кэпсээтэ.
Оҕо оһуохайын түһүлгэтэ тэриллэригэр Саха Өрөспүүбүлүкэтин Үүнэр көлүөнэтин тус сыаллаах пуондата сүрүн спонсорынан буолла. «Үүнэр көлүөнэ пуондата оҕолорбут төрүт тылыгар, култууратыгар тардыһалларын туһугар улахан болҕомто уурар. Арыйаана Михайлова кыра оҕо эрдэҕиттэн оһуохай түһүлгэтин тэрийэн, аны билигин эһигини – эдэр ыччаты оһуохай алыптаах оонньуутугар угуйар. Эһиги кинини холобур оҥостон, улаатаххытына ааттаах-суоллаах этээччи буолуоххут диэн эрэнэбин. Ол туһугар Үүнэр көлүөнэ пуондата өссө салҕыы өйүүр санаалахпыт», — диэн СӨ Үүнэр көлүөнэтин тус сыаллаах пуондатын генеральнай дириэктэрэ Владимир Егоров бэлиэтээтэ.
Үгүс оҕолорго оһуохай тардыытыгар бастакы холонуулара буолар. «Оһуохайынан былырыыҥҥыттан дьарыктанар буолбутум, олус сөбүлүүбүн. Бииргэ үөрэнэр оҕолорбун кытта кылааска оһуохай тардаччыбыт. Ону таһынан мин хомуска онньуурунан дьарыктанабын», — Хатас орто оскуолатын 6 кылааһын үөрэнээччитэ Кира Неустрова.
Улахан бөлөххө Хаҥалас улууһун Улахан-Аан сэлиэнньэтиттэн 11 кылаас үөрэнээччитэ Дархан Тихонов оһуохайынан кэлбит дьону сөхтөрдө. «Оһуохайынан дьарыктаммытым үһүс сыла буолла. Ону таһынан кыра оҕо эрдэхпиттэн – уһуйаантан саҕалаан олоҥхолуубун. Ыһыахтарга буолар күрэхтэргэ куруутун кыттаччыбын уонна миэстэлэһээччибин. Оһуохай төрөөбүт тылым саппааһын улаатыннарар, тылым баай буолар», — диэн кэпсээтэ.
Күрэх түмүгэр:
Гран-При Ньурба улууһуттан 12 саастаах этээччи Яковлева Камелия кыайда.
1 бөлөх (6-9 саастаахтарга):
1 үрдэл — Рожин Эрсан Горнай, 9 саастаах
2 үрдэл — Шишигина Айаркуо, Дьокуускай, 8 саастаах
3 үрдэл — Шарин Вася, Дьокуускай, 6 саастаах
2 бөлөх (10-13 саастаахтарга):
1 үрдэл — Дорофеева Дамира, Уус Алдан, 12 саастаах
2 үрдэл — Дорофеев Айсен, Дьокуускай, 11 саастаах
3 үрдэл — Васильев Витя, Дьокуускай, 10 саастаах
3 бөлөх (14-17 саастаахтарга):
1 үрдэл — Васильев Эрхан, Үөһээ Бүлүү, 17 саастаах
2 үрдэл — Степанова Лена, Амма, 16 саастаах
3 үрдэл — Тихонов Дархан, Хаҥалас 17 саастаах
Маны таһынан хас биирдии бөлөххө 5-тии бириистээх анал ааттар туттарылыннылар.
Төрүт матырыйаал: https://fondyakutia.ru/2025/12/06/puonda-k-lee-ininen-r-sp-b-l-ketee-i-o-uokajdaan-ojuo-u-k-reh-aasta/