Хас саҥа үүммүт сылга Гавриил ураты идеялары толкуйдуур. Иккис сылын "Саха сакалаата" ХЭУо тэрилтэни кытта дуогабар түһэрсэн, минньигэс амтаннаах сакалааты сакаастаан атыыга таһаарар.
Былырыын Хаандыга туһунан сакалаата атыыга тута былдьаһыгынан барбыта. Аҕыйах хонуктааҕыта "Томпонские просторы" диэн ааттаах сакалаат атыыга таҕыста.
"Бэйэм Томпо оройуонун туһунан сакалаат баар буолуон баҕарбытым ыраатта.Ойуутун таларбар сөптөөх уруһуй булбатаҕым. Бэйэбит уруһуйдьуттарбыт ойуутунан оҥорбут киһи диэн баҕалааҕым. Уон сыллааҕыта Тополинай бөһүөлэгэр сылдьан түһэрбит былакаат хаартыската баара. Ол ойууну наһаа сөбүлээбитим. Уруһуйум идеятын Надежда Бурцева уонна Надежда Клышейко-Кладкина оҥордулар. Онон кинилэргэ махталым улахан.
Дьон-сэргэ бэйэлэрин дойдуларын ойуулаах сакалааты бэлэххэ хамаҕытык атыылаһаллар. Өссө эбиитин састааба ыраас экологическай бородууктаттан турар", - диэн бэйэтин санаатын Гавриил үллэһиннэ.
Саҥа үүнэн эрэр сылга чугас дьоҥҥутугар атыылаһан бэлэх ылан оҥоруҥ диэн "Томпонский вестник" хаһыат ынырар.