Финал алтынньыга Москубаҕа “Өйдөбүл тыыннаах” («Память жива») диэн Бүтүн Арассыыйатааҕы пуорумҥа ыытыллар. Онно Саха сирин аатыттан Өймөкөөн орто оскуолатын история учуутала, педагог-тэрийээччи Анисья Винокурова кытта барара былааннанар.
Анисья Валериевна оскуола түмэлин үлэтин туһунан биһиги кэрэспэдьиэммитигэр сэһэргээтэ.
— Күрэс РФ Бэрэсидьиэнин сорудаҕынан уонна РФ Үөрэҕириигэ министиэристибэтин өйөбүлүнэн ыытыллар. Өймөкөөн орто оскуолатын түмэлэ — оҕо уопсай култууратын сайыннарар уонна иитэр-үөрэтэр эйгэнэн буолар. Манна мусуой уруоктара, интэриэһинэй быыстапкалар, араас тэрээһиннэр уонна эскурсиялар ыытыллаллар.
Түмэлгэ хас да бырайыак үлэлиир. Олор истэригэр «АлСиб — хорсун буолуу суола» диэн историческай кыраайы үөрэтэр эспэдииссийэ сүрүн миэстэни ылар. 8-10-с кылаас үөрэнээччилэрэ аан дойду иккис сэриитин кэмигэр тыын суолталаммыт салгын трассатын — Аляска-Сибиир устун айан историятын дириҥник чинчийэллэр, дьаныһан турар үөрэтэллэр.
Түгэнинэн туһанан оскуола түмэлин салайааччытыгар, настаабынньыкпар Альбина Еремеевна Алексееваҕа уонна түмэли сүрүннээччи Анна Гаврильевна Винокуроваҕа куонкурус тургутууларыгар көмөлөрүн, өйөбүллэрин иһин махталбын тиэрдэбин.
Бырайыак кыттыылааҕа, 8 кылаас үөрэнээччитэ Малика Татаринова санаатын маннык үллэһиннэ:
— Бүтүн Арассыыйатааҕы күрэскэ оскуолабыт кыттыыта биһигини барыбытын биир сомоҕолоото. Мин мантан сиэттэрэн төрөөбүт дойдум устуоруйатын олус сэргиир буоллум. Маннык баай ис хоһоонноох үлэлээх-хамнастаах, интэриэһинэй олохтоох оскуолаҕа үөрэнэрбинэн киэн туттабын. Мин түмэлгэ волонтердуубун: архыыптары наардыырга көмөлөһөбүн уонна экскурсиялары ыытарга үөрэнэбин.
Оттон 7-с кылааска үөрэнэр Михаил Сутаков:
— Мин «Аляска-Сибирь» трасса айар эспэдииссийэтигэр кыттыбытым. Биһиги оскуолабыт түмэлэ оҕолорго инникитин элбэҕи билиэн-көрүөн баҕалаах киһи ааспыты умнуо суохтаах, былыргыны харыстыахтаах диэн өйдөбүлү иҥэрэр. Олус дириҥ суолталаах уонна интэриэһинэй дьыаланан дьарыктана сылдьарбыттан дуоһуйабын уонна учууталларбар махтанабын, — диэн санаатын эттэ.
Любовь Кривошапкина, “Хотугу сардаҥа” хаһыат
Хаартыска: А. Винокурова