«Кадры в АПК» бэдэрээлинэй бырайыак чэрчитинэн 67 эрэгийиэҥҥэ 1 тыһыынчаттан тахса агротехкылаастар аһыллыбыттар, онно 16 тыһыынчаттан тахса киһи үөрэнэрин эттилэр. 2030 сылга диэри кинилэр ахсааннарын 18 тыһыынчаҕа диэри оттон үөрэнэр оскуола оҕолорун ахсаанын 300 тыһыынчаҕа диэри элбэтэр былааннаахтарын туһунан кэпсээтилэр.
2025 сыл балаҕан ыйын 1 күнүттэн орто уопсай үөрэх бэдэрээлинэй судаарыстыбаннай ирдэбилигэр туспа агротехнологическай үөрэх профила киллэриллибиттин, ону таһынан үрдүкү оскуола бэдэрээлинэй бырагырааматыгар уларытыылар киирбиттэрин тустарынан ахтылынна. Аҕыс идэ салаатын хабар «Шаг в агротех» диэн үөрэх босуобуйаларын оҥорууга үлэ тэтимнээхтик ыытыллар эбит. Үөрэх ситимин оҥорууга 350-тан тахса АПК тэрилтэтэ – улахан холдиннартан уонна эрэгийиэн хампаанньаларыттан саҕалаан пиэрмэр хаһаайыстыбаларыгар диэри кыттыстылар. Кинилэр быраактыка дьарыктарын, экскурсиялары уонна стажировкалары тэрийиигэ кытталлар.
Пленарнай сиэссийэ чэрчитинэн агротехнологическай үөрэх систиэмэтин сайыннарыыга кылааттарын иһин учууталлары уонна оскуола салайааччыларын наҕараадалааһын буолла.
И.Е. Федосеев – Доосо аатынан Дириҥнээҕи агрооскуола химияҕа уонна биологияҕа учуутала Клавдия Андреевна Дьячковскаяны үлэтин үрдүктүк сыаналааннар махтал суругунан наҕараадалаатылар.
Клавдия Андреевна, Агротехнологическай үөрэҕи сайыннарыыга уонна кэнэҕэски исписэлиистэри бэлэмнээһиҥҥэ киллэрбит кылаатыҥ – нэһилиэк, улуус уонна бүтүн республика сайдыытын бөҕө тирэҕэ. Убаастанар учууталга үөрүүнү, сатабыллаах үөрэнээччилэри уонна үлэтигэр-хамнаһыгар саҥа үрдэллэри баҕарыаҕыҥ!
Сэмэн Жендринскэй, Саҥа Олох