Бэҕэһээ, атырдьах ыйын 6 күнүгэр, улуус баһылыгын экономическай сайдыыга солбуйааччы Борис Васильев, тыа хаһаайыстыбатын управлениетын салайааччыта Владимир Анисимов Туойдаах нэһилиэгэр тахсан отчуттары кытта көрсөн, тирээн турар сытыы кыһалҕаны туох-хайдах быһылаахтык быһаарар туһунан кэпсэттилэр.
Нэһилиэк баһылыга Михаил Николаев этэринэн, туойдаахтар биир улахан Маар Күөл диэн сиргэ бары кэриэтэ оттууллар. Эрдэ үчүгэй дьылларга бу сиртэн 200-чэ туонна от кэлэр эбит буоллаҕына, билиҥҥи уустук балаһыанньанан биир даҕаны кэбиһиилээх от тура илик. Ходуһаҕа бэл, сытыйбыт, түүнүгүрбүт от сыта киһи муннун аһытар. Биллэн турар, маннык от сүөһүгэ, сылгыга кутталы үөскэтэр диэн олохтоохтор дьиксинэллэр.
“Маннык хартыына биһиги нэһилиэккэ бүтэһигин, мин кыра эрдэхпинэ 1997 сыллаахха буолбута. Сир-дойду бүтүннүү ууга баран, иҥэмтиэтэ суох, куһаҕан отунан аһаан сүөһү-сылгы бөҕө өлбүтэ диэн кырдьаҕастар кэпсииллэрэ. Быйыл дьэ, хайдах буоларбыт биллибэт”, – диэн сылгы хаһаайыстыбалаах Герасим Ераскумов санаатын үллэстэр.
Ол да буоллар олохтоох отчуттар быар куустан олорбокколор чугас аймах-билэ дьонноругар кыттыһан, атын сиргэ баран оттуурга күһэллэллэр. Ол үрдүнэн кыстыыр отторо син биир тиийбэт.
«Мобильнай биригээдэ тэриллэн ыраах сытар сирдэри оттуурга, ыаллыы улуустартан оту атыылаһыыга, итиэннэ тиэйии-таһыы ороскуотун толуйарга үөһэттэн көмө көрүллэрэ буоллар. Ону тэҥэ, күһүөрү өртөөһүн үлэтэ барарыгар көҥүл биэрэллэрэ буоллар», – диэн Туойдаах нэһилиэгин олохтооҕо Людмила Копылова санаатын этэр.
Елизавета Титова, "Сунтаар сонуннара"