Манна Сахабыт сирин араас муннуктарыттан 33 ырыаҕа кутун туттарбыт айар талааннаахтар кэлэн кыттан бардылар. Куонкурус түмүгэ кыттааччылар саастарынан бөлөхтөрүнэн таҕыста.
Бастакы 14-17 саастаахтарга Айсиэн Кутуков Уус Алдантан бастакы истиэпэннээх лауреат буолла. Иккис истиэпэннээҕинэн Дьокуускайтан Вик тория Васильева, үһүс – Үөһээ Бүлүүттэн Самира Архипова ааттаннылар. Оҕолорбут салайааччыларынан туһааннааҕынан Ульяна Стрекаловская, Александра Сивцева, Саргылана Карпова буолаллар.
18-35 саастаахтар бөлөхтөрүгэр бастакы истиэпэннээх дипломунан Уус Алдантан Иван Старостин, иккискэ Чурапчыттан Сахаяна Лукачевская, үһүскэ Хаҥаластан Лулиетта Софронова таҕыстылар. Манна бастакы истиэпэннээх лауреатынан Амматтан Александр Карманов, Дьокуускайтан Мичил Моисеев, иккис истиэпэннээх дипломнарынан Намтан Анастасия Протопопова буоллулар, үһүскэ Дьокуускайтан Иоганн Матвеев, Анатолий Гуляев триолара бэлиэтэннэ.
36-48 саастаахтарга туһааннааҕынан дипломнарынан наҕараадаланнылар Дьокуускайтан Альфия Леханова, Кэбээйиттэн Валентин Слепцов, Усуйаанаттан Наталия Стручкова. Бастакы истиэпэннээх лауреатынан Хаҥаластан Замир Горохов буолла, иккис – Кэбээйиттэн Терентий Егоров, үһүс – Хаҥаластан Алена Слепцова. Гран-при үрдүк аатын Уус Алдантан Владислав Лукачевскай ылла.
Бириистэр да ботуччу буоллулар. Александр Самсонов-Айыы уолун үөлээннээхтэрэ туруорбут бириистэрэ Виктория Васильеваҕа тигистэ. Улахан Аантан “Көмүлүөк» түмсүү бирииһэ Уус Алдан ырыаһытыгар Тимур Корякиҥҥа, Шурик учуутала, РФ үөрэҕириитин бочуоттаах үлэһитэ, СӨ үөрэҕириитин туйгуна Татьяна Давыдоваттан “Саамай эдэр ырыа айааччы” анал аат бирииһэ Айсиэн Кутуковка туттарылынна.
Айыы Уолун ийэтэ Марфа Иннокентьевна үөлээннээхтэриттэн анал бирииһин Наталия Стручкова уонна Альбина Соломонова туттулар. Онтон Ийэ бэйэтин бирииһин Чурапчы Дириҥиттэн ырыаһыт Прокопий Наумовка анаата.
Бу күн Айыы Уолун, ону сэргэ ааптардар айбыт ырыалара ылланнылар, чаҕылхай сулуспут туһунан, кини аатын үйэтитэ сылдьар күн күбэй ийэтин Марфа Иннокентьевна аатыгар кэрэ тыллар этилиннилэр. Ыраахтан-чугастан ыалдьыттарбыт Александр Самсонов пааматынньыктаах скверигэр, олорбут дьиэтигэр түмэлгэ сырыттылар, оҕо сааһа ааспыт дойдутун, доҕотторун көрөн элбэҕи билэн-көрөн астынан тарҕастылар.
Улахан-ааннар бу күрэһи өрүү бэрт тэрээһиннээхтик ыыталлар. Бу да сырыыга туох кыалларынан тэрийээччилэргэ, улуус култуураҕа салалтатыгар, “Аан Аартык” култуурабыт дьиэтигэр бириистэринэн эҥин көмөлөстүлэр. Ол курдук, хампаанньалар, маҕаһыыннар, урбаанньыттар, РЭС кэлэктиибин сэргэ олохтоох тэрилтэлэрбит, “Кыымчаан” оҕо уһуйаана, түмсүүлэр о.д.а. биир дойдулаахтарбыт спонсордаатылар. Барыгытыгар махтал тылларын аныыбыт.
Альбина Трифонова, бибилэтиэкэр. Улахан Аан сэл., "Хаҥалас"
Хаартыскалары Марина Соломонова тиксэрдэ