Арсен Федоров, күрэхтэһии сүрүн судьуйата:
— Бу күрэхтэһии Чурапчы сиригэр-уотугар үһүс төгүлүн ыытылынна. Тэрийээччилэр хас биирдии кэлбит дэлэгээссийэни болҕомтолоохтук көрүстүлэр. Быйыл 13 хамаанда кыттыбытыттан, икки хамаанданы Чурапчы улууһа туруорда. Оҕолор 7 түһүмэҕинэн сатабылларын, кыайыыга дьулуурдарын, дьаныардарын көрдөрдүлэр. Ол курдук, аан бастаан дойду историятыгар аналлаах өйү тургутар куонкуруһу аастылар. Онтон строевой хаамыыга күрэхтэстилэр. Салгыы уопсай физическай бэлэмнэрин көрдөрдүлэр. Чурапчы, Амма, Уус Алдан уонна Горнай улууһун иитиллээччилэрэ үрдүк көрдөрүүлэри ситиспиттэр. Бары да хамаандалар уопсай бэлэмнэрин таһыма сылын аайы үрдээн иһэрэ көстөр. Онон кыайыылааҕы быһаарыы уустугуран иһэр.
Күрэхтэһии түмүгүнэн 16 очукуолаах Чурапчы улууһун «Факел» хамаандата эрэллээхтик инники таҕыста. Чурапчы улууһун «Беркут» хамаандата 23 очукуону ылан II миэстэ, Амма улууһун «Молот» хамаандата 29 очукуону ылан III миэстэ буоллулар. Маны таһынан хас биирдии түһүмэх кыайыылаахтарын бэлиэтээтилэр. «Бастыҥ хамандыыр» анал аат Горнай улууһун «Сокол» хамаанда хамандыырыгар Алгыс Кардашевскайга тигистэ.
Антон Иванов, кыайыылаах хамаанда хамандыыра:
— Биһиги хамаандабытыгар 7 Чурапчытааҕы спорт интэринээт-оскуолатын иитиллээччилэрэ, 2 И.М. Павлов аатынан Чурапчы орто оскуолатын уонна 1 Алаҕар орто оскуолатын үөрэнээччилэрэ бааллар. Бэйэ-бэйэбитин кытта уруккуттан билсэбит. Ол эрээри маннык састаабынан бастакыбытын өрөспүүбүлүкэтээҕи тэрээһиҥҥэ кытынныбыт. Түһүмэхтэр олус судургу буолбатахтар. Саамай ыарырхаппыт түһүмэхпитинэн саа иитиитэ буолла. Манна 5-с миэстэ буоллубут. Оттон байыаннай эстафета түһүмэҕэ чэпчэки этэ. Күүскэ, үчүгэйдик бэлэмнэммит буолан, кыайыыга эрэллээх этибит.
Өрөспүүбүлүкэ чиэһин бүтүн Арассыыйатааҕы күрэххэ көмүскүү барар «Факел» хамаандаҕа ситиһиилэри баҕарабыт.
Марфа Петрова, "Саҥа олох"