Быйыл лааҕыр үлэтин Евдокия Прокопьевна Винокурова уонна Анжелика Алексеевна Радченко салайдылар. Манна оҕолор оҕуруоту көрөллөр-истэллэр, ону таһынан дойдубут эмтээх үүнээйилэрин хаһан, хайдах хомуйарга, хатарарга үөрэнэллэр.
- Ол курдук былырыыҥҥыттан кучу (кипрей, иван-чай) сэбирдэҕин хомуйан, кыһыҥҥыга хаһаанар буолбуппут. Онно эбии моруоска сибэккитин хатаран булкуйбуппут уонна ханна да суох чэйи оҥорбуппут.
Былырыын оҕолор кучу сэбирдэҕин биир ньыманан хатарбыт эбит буоллахтарына, быйыл иккис ньыманы баһылаатылар. Ону таһынан кучу сибэккититтэн мүөт оҥорорго холоннулар. Маныаха анаан кучу сибэккитин үргээн, оргутан, иһиттэргэ куттулар. Онон бэйэбит дойдубут эмтээх, дыргыл сыттаах мүөттээх чэйбитин иһэн, доруобуйабытын бөҕөргөтүөхпүт, - диэн Орто Халыма улууһун Өлөөкө Күөлүн орто оскуолатын үөрэнээччитэ Нарыйаана Винокурова суруйар.