Бүтүн Арассыыйатааҕы иитээччилэр куонкурстарын өрөспүүбүлүкэтээҕи түһүмэҕэр 24 улуустан 26 иитээччи кыттыыны ылла. Кыттааччылар орто саастара 37 сыл, уопсай педагогическай ыстаастара 847-ттэн тахса сыл. Кыттааччылар саамай кыра педагогическай ыстаастара – 4 сыл, онтон саамай уһун – 26 сыл.
Куонкуруска 16 иитээччи, 4 музыкальнай салайааччы, физическэй култуура 4 инструктора, 1 педагог-психолог кытыннылар. Уопсай түмүккэ Чурапчы улууһуттан Прасковья Борисова аатынан “Улыбка” оҕону сайыннарар-киин уһуйаан (сэбиэдиссэй Екатерина Иванова) иитээччитэ Анастасия Нестерова кылаан кыайыылаах үрдүк аатын ылла. Инньэ гынан Анастасия Николаевна аны күһүн Москуба куоракка ыытыллар Бүтүн Арассыыйатааҕы куонкуруска Саха сирин чиэһин көмүскүөҕэ.
Маннык улахан куонкуруска биллэн туран хамаанда өйөбүлэ быһаарыылаах оруолу ылар, киниэхэ “Улыбка” уһуйаан үлэһит бөлөҕө күүс-көмө, өйөбүл буоллулар.
Санатан эттэххэ, РФ Бэрэсидьиэнэ Владимир Путин оҕо көмүскэлигэр судаарыстыбаннай бэлиитикэни киэҥник тарҕатар сыалтан 2024 сылы – Арассыыйаҕа Дьиэ кэргэн сылынан биллэрбитэ. Оттон Ил Дархан Айсен Николаев Саха Өрөспүүбүлүкэтигэр 2024 сылы – Оҕо итиэннэ Чурапчы улууһугар – Ыал саргыта сылларынан биллэриллибиттэрэ.
Сэмэн Жендринскэй, "Саҥа олох"