Социальнай ситимнэртэн бэҕэһээҥҥи ардах туһунан дьон санаатын хомуйан таһаарабыт. Дьон тэлгэһэбит, саҥа өнүйэн эрэр хортуоскабыт буолата ууга барда диэн хараасталлар. Сааскы хаар уутунааҕар, бу күннэргэ түспүт ардах уута элбэх буолан биэрдэ.
Бэҕэһээ Сунтаарга киин уулуссалар бүтүннүү ууга барбыттарын туһунан дьон социальнай ситимнэргэ үллэстибиттэрэ, кутталлаах учаастактар тустарынан сэрэтиилэри ыыталаабыттара.
Ол курдук, «Тандем» атыы-эргиэн киинин ханаабатын муостата элбэх уу ааһарын тулуйбакка дагдайан тахсан, тиэхиньикэҕэ мэһэйдэри үөскэттэ. Сатыы да дьон билбэккэ ханааба уутугар түспүттэр. Билигин бу кутталлаах учаастакка уу баран ханаабалары өрөмүөннүүр үлэ барар.
Аны, пааркабыт түһүлгэтэ ууга баран, баһаам хопто үөрэ мустубут. Маннык көстүүнү урукку өттүгэр көрбөтөхпүт.
Бу сайыммыт хаһааҥҥытааҕар да өлгөм үүнүүлээх дьыл буолла диэн, сир асчыттар дьэдьэн маска эрэ үүммэтэҕин туһунан үллэстэллэриттэн сылыктыахха сөп.
Бу ардахтар кэннэ дьэдьэммит тохтоото диэн хомойоллорун этэллэр. Ардахха баттатан хаһаайкалар бэйэлэрин социальнай ситимнэригэр булбут дьэдьэннэрин сибиэһэйдик араастаан харайалларын туһунан үллэстибиттэрин көрбүппүт.
Дьэдьэни вакуум пакекка салгынын оботторон баран харайдахха өр сибиэһэй сытар эбит.
Отчуттар оттуур ходуһаларбыт ардах кэннэ ууга сыталлар диэн этэллэр, онон окко киирии бытаарар туруктаах. Күн-дьыл туран биэрдэҕинэ тыа туруу үлэһит дьоно оту кыайа-хото тутарга бэлэмнэр.
Мира Афанасьева
(Хаартыскалары уопсастыбаннай кэрэспэдьиэммит Зоя Семенова тиксэрдэ)
Сунтаар сонуннара