Ити кэм иһигэр, “Центральнай” ТОС төрүт олохтоохторо Антипиннар үс оҕону төрөтөн, киһи-хара оҥорон, билигин сиэннэрин иннигэр туох баар кыһамньыларын уураннар үлэҕэ тапталы иитэллэр.
Александр уонна Татьяна Антипиннар – бэйэ дьыалатыгар, идэҕэ дьулуурдарынан кимиэхэ баҕарар чаҕылхай холобур буолаллар.
Александр Иванович 1952 сыллаахха кулун тутар 15 күнүгэр Чурапчы нэһилиэгэр күн сирин көрбүтэ. Орто оскуоланы бүтэрэн, Ийэ дойдуга ытык иэһин төлөөн аармыйаҕа сулууспалаан кэлэн баран Омскай куоракка Сибиирдээҕи суол уонна тыраанспар үнүстүүтүн бүтэрэн 1983 сыллаахха инженер-механик идэтин баһылаабыта. Үлэтин Чурапчы улууһун “Сельхозтехника” тэрилтэтиттэн саҕалаабыта онтон кэлин 2007 сыллаахха бочуоттаах сынньалаҥҥа тахсыар диэри “Дорстрой” тэрилтэҕэ суолу оҥорор учаастак маастарынан үтүө суобастаахтык үлэлээбитэ.
РСФСР уонна РФ Бочуоттаах донора, Дойду уонна СӨ доруобуйатын харыстабылын туйгуна, Чурапчы улууһунааҕы доруобуйа харыстабылын бочуоттаах бэтэрээнэ Татьяна Викторовна 1954 сыллаахха олунньу 27 күнүгэр Костромской уобалас Ореховскай оройуонун Середнево диэн нэһилиэгэр төрөөбүтэ. 1973 сыллаахха Ленинград куоратыгар биэлсэр идэтин баһылаабыт эдэр кыыһы оччотооҕу Саха АССР доруобуйаҕа харыстабылын министиэристибэтэ Чурапчытааҕы киин балыыһаҕа төрүүр отделениеҕа акушерынан анаан ыыппыта. Кини тапталлаах идэтигэр 2006 сыллаахха диэри үлэлээн баран онтон кэлиҥҥи сылларыгар үрдүкү медицинскэй сиэстэрэ, итиэннэ эпидемиолог быраас көмөлөһөөччүтүнэн үлэлээн 2021 сылга бочуоттаах сынньалаҥҥа тахсыбыта.
Александр Иванович уонна Татьяна Викторовна Антипиннары өссө төгүл улахан үөрүүлээх, дьоро түгэҥҥитинэн эҕэрдэлиибит. Бэйэҕитигэр, чугас дьоҥҥутугар кытаанах доруобуйаны, уһун үйэни, иллээх-эйэлээх олоҕу баҕарабыт!
Сэмэн Жендринскэй, Саҥа олох