“Биһиги ити күн сарсыарда рейдэттэн кэлэн иһэн суол кытыытынааҕы элгээҥҥэ икки киһи муустаах ууга түспүт кыыл табаны быыһыы сылдьалларын көрөн тохтообуппут. Ол курдук икки булчут уолаттар эрэһиинэ оҥочолорун көмөтүнэн киирэн, табаны үүрэн муустан таһаара сатыы сылдьаллар этэ. Онно көмөлөһөн, бары көмөлөөн табабытын таһаардыбыт. Бу кыыл тыаттан кэлэн суол нөҥүө туораары, элгээн мууһа уйбакка түспүт. Туруга этэҥҥэ”, — диэн улуустааҕы айылҕа харыстабылын судаарыстыбаннай хонтуруоллуур инспекция эколога Станислав Васильев билиһиннэрдэ.
Ити курдук хара тыабыт биир маанылаах кыыла үтүө санаалаах булчуттар уонна экологтар көмөлөрүнэн муустан төлөрүйэн, хара тыатын диэки түһэ турда. Станислав Артурович бэлиэтээбитинэн, кыыл кутталлаах балаһыанньаҕа киирбитин көрөн көмөнү оҥорбут булчут СӨ экологияҕа, айылҕа харыстабылыгар уонна ойуур хаһаайыстыбатыгар министиэристибэтин быраабылатынан уочараттаах лицензияны быһа ылыан сөп.
“Амма олоҕо” хаһыат